Mtsogoleri wa dziko lino a Lazarus Chakwera wakhazikitsa komiti yapadera yoti ifufuze zokhudza ngozi ya ndege yomwe inapha wachiwiri kwa mtsogoleri wa dziko lino a Saulos Chilima ndi anthu ena asanu ndi atatu.
Izi zadziwika kudzera mu kalata yomwe yasayinidwa ndi mlembi mu ofesi ya mtsogoleri wa dziko lino ndi nduna a Colleen Zamba.
Malingana ndi kalatayi, komitiyi ikutsogoleredwa ndi Justice Jabbar Alide ndipo mamembala ake ndi Monsinor Patrick Thawale, Pastor Toney Nyirenda, Bishop Mary Nkosi, Dr Sunduzwayo Madise, Inkosi yamakosi Mbelwa 5, Senior Chief Makwangwala, Mr Justin Mkandawire, Brigadier Cosgrove Mituka (Retired), Mrs Emma Kaliya, Mr Sylvester Namiwa, Mr Dixie Kwatani, Professor Nyengo Mkandawire, Mr Allan Chinula SC, Mrs Esther Chioko, Mrs Nimia Kambiri Mzembe, Mrs Lidia Chiotha, Dr Ruth Mwandira, ndi Mrs Mirriam Wemba.
Komitiyi ikuyembekezeka kumaliza kafukufuku wake ndikupereka zotsatira kwa a Chakwera pofika pa 30 November chaka chino.
A Chakwera achita izi pogwiritsa ntchito gawo la malamulo oyendetsera dziko lino omwe amapereka mphamvu kwa mtsogoleri wa dziko kuchita izi.
Malingana ndi kalatayi, mamembala omwe asankhidwawa awalumbiritsa lolemba likudzali ku nyumba ya chifumu mu nzinda wa Lilongwe.
